Sekretari i Përgjithshëm i NATO-s, Jens Stoltenberg ka dhënë një intervistë të gjatë për të përditshmen malazeze “Vijesti”, ku përveç vendosjes së theksit te stabiliteti i rajonit, ka prekur edhe temën e ndërtimit të Portit të ri të Durrësit, ku qeveria shqiptare ka propozuar vendosjen e një baze navale të NATO-s.
Duke komentuar ndërtimin e bazës detare në Detin Adriatik, sipas tij NATO po negocion me Shqipërinë por edhe për investime të tjera të mundshme dhe vendosjen e trupave në rajon.
Gjithashtu, Stoltenberg tha se Koncepti i ri Strategjik i NATO-s, i miratuar në Samitin e Madridit, konfirmon edhe një herë strategjinë e Ballkanit Perëndimor, që është me rëndësi për Aleancën.
NATO do të vazhdojë të promovojë stabilitetin, sigurinë dhe bashkëpunimin në rajon, duke përfshirë përpjekjet e përditshme të KFOR-it, të selisë sonë në Sarajevë dhe të zyrës sonë në Beograd, tha Stoltenberg, duke shtuar se siguria dhe stabiliteti në Ballkanin Perëndimor është e rëndësishme për NATO-n dhe për paqen dhe stabilitetin në Evropë.
I pyetur nëse ishte i shqetësuar për stabilitetin afatgjatë të Kosovës, Stoltenberg tha se diskutoi me lidershipin e Prishtinës dhe Beogradit për tensionet në Kosovë dhe shtoi se të dyja palët duhet të qëndrojnë të qetë, të shmangin veprimet e njëanshme dhe të angazhohen në mënyrë konstruktive në dialogun e ndërmjetësuar nga BE.
“Në përputhje me mandatin e tij në OKB, misioni i KFOR-it po monitoron nga afër situatën dhe është i përgatitur të ndërhyjë nëse rrezikohet stabiliteti. Misioni ynë është i fokusuar në sigurimin e një mjedisi të sigurt dhe të sigurt dhe lirinë e lëvizjes për të gjithë popullin e Kosovës”, tha Stolternberg.
Sekretari i Përgjithshëm i NATO-s tha se Aleanca vazhdon të mbështesë plotësisht dialogun e ndërmjetësuar nga BE dhe u bën thirrje të gjitha palëve të vazhdojnë negociatat sepse ato janë të një rëndësie kyçe për paqen dhe sigurinë rajonale.
